湖南辣鱼美食研发组

脂深老饕澳门暴走 x 吃!!!

何执记广州口福俱乐部2018-10-20 07:53:47

说明

感谢何执记主席D先生安排哩次澳门行程,而且收集路线资料都相当花费时间咯……


 DAY 1 


1

富记粥品


今次出门比较早,为嘅系一碗早上11点即闭门谢客嘅生滚粥……

富记粥品,D先生途经多次都未得尝嘅逸品,今次唔会摸门钉啦~~~ 

 

过气老油条, 虽然过气,不过点都系粥类嘅好拍档!!!

皮蛋瘦肉粥,粥底绵滑,底味十足,不过微微有啲燶左……

鱼片粥,鱼片生上,用多油封面,仲要多姜劈腥,4成熟鱼片,鲜嫩可口……

肉丸及第粥,肉丸打得比较实,但系无咩肉味,而且有少少粉头嘅感觉……

 


2

新东海美食


新东海,听主席讲,哩间野嘅出品响澳门嚟讲比较有争议性……


店主叶圣欣曾于国外游学,在世界多个地方曾经营过餐馆,对各国的食材都颇为熟悉。由于人蓄须后长得像麻原彰晃,故人称教主。而新东海的出品也颠覆了许多传统的概念,成为澳门城中甚具话题性的餐厅。

 

PS:哩张画好大,对比下面嘅冰箱就知道啦……

 

烟鸭胸捞粗,鸭胸味道浓郁,烟熏程度比平时吃嘅要深,而且带一啲香草嘅味道,粗面就有啲类似油面嘅感觉,不过比油面爽口……


烟鸭胸鹅肝酱菠萝包,哩个野比较凶恶,浓郁嘅鸭胸味会遮盖左鹅肝酱嘅味道,点知其实只会盖住一阵,好快鹅肝酱嘅味道就会抢出嚟,而且鹅肝酱同个包本身几夹!!


杏仁露,杏仁经过炒制或者烘焙增香,侬稠适中,入口顺滑,佐以烟鸭胸食用,味道多有变化~~~


椒盐脆豆腐,自制豆腐嫩滑,外层脆皮,几香口嘅一个菜式,不过就系太咸啦……


头抽手打花枝丸,花枝丸吃落爽口细致,唔系嗰种添加好多粉营造爽口但会发硬嘅感觉,实实在在嘅墨鱼香味,但系上面淋嘅头抽味道比较奇怪,偏甜无咩咸味,而且无咩豆味酱香,奇怪……

 

3

回力美食中心 


以罐焖牛肋为卖点嘅回力美食中心

兰度炒带子,都几有镬气,冷冻带子肉仲可以保持爽口(用碱?)且不失味道,但系芥兰就稍显苦涩,而且过水之后都仲未炒返香。

主角出场,罐焖牛肋,牛肋应该系类似王品牛排相同一个位置,不过就系拆骨制作;牛肋肉焖得软糯酥香,味道偏甜,调味类似沪菜……

 

4

永安咖啡室


柠檬茶

咸牛脷通,牛脷咸香嫩口,吃落唔硬

咖喱油,加左啲落去通粉度,顿时生香,香辣味道刺激食欲~~~

烟鸭胸、黑椒牛柳粒丁,现煎牛柳粒焦香肉嫩,同出前一丁系加埋就系面中有肉、肉中有面~~~

 

5

杏香园


吃左甘多肉,转场杏香园吃甜品润润口


芒果龙眼椰汁西米,龙眼意外嘅甜味,反而芒果偏酸,唔知系唔系要中和一下味道呢,夹埋椰汁吃又几完整啵,“甜-酸-甜”甘嘅。


汤丸椰汁马蹄露,汤丸味道好淡,唔知系唔系为健康考虑而少甜呢,哩间野嘅甜品都唔会好甜。


竹笙蛋白核桃露,最精彩嘅甜品,核桃露香滑细腻,去除左核桃肉表皮嘅苦涩味,加埋蛋白一齐 吃十分顺滑…… 
 

 

6

安记


川芎白芷鸡汤米线,哩个太顶瘾,完全系药材味,不过鸡肉仲几嫩……

 

7

泉记喳咋


泉记喳咋,同另外一种喳咋唔同,哩个有啲似杂粮类嘅煮粥,有可可嘅香味,里面有啲带有韧性而且爽口嘅麦粒

 

8

新威廉咖啡


新威廉咖啡,打包左忌廉筒同菠萝包行街,真系好耐无吃过忌廉筒,特别系哩种酥软嘅外皮,而家好难吃倒咯……

 

 

9

马庆康


响马庆康打包奶茶行街,可以攞走个冻奶茶樽,哩间嘅奶茶苦味突出,奶味又平平……

 


10

华记

 

华记,咖喱鱿鱼同牛腩,所谓咖喱就系单调嘅辣味,无咩香味,最严重系啲鱿鱼泡发到异常难食啊!!!

 

11

兴利美食


第一日嘅重头戏,晚餐系兴利美食嘅传统粤菜!!!部分菜式需要预订,哩餐真系麻烦晒D先生咯~~~


八宝莲皇鸭,全鸭剔骨,醸入莲子、百合、去壳绿豆、蛋黄等,炖煮而成;可能做法改良左,同广州嘅唔同,哩只鸭嘅味道唔浓,不过因为份量问题,我哋只吃倒好少,费煞师傅心机咯,罪过……

 

佛手罗盘,冬瓜扣住一啲煮好嘅斋菜,内里斋菜浓香,各味合一,外层冬瓜亦吸收斋菜味道,入口软糯,唔错~~~

 

菊花鲈鱼羹,味道清鲜,汤水侬稠适宜,哩个唔错……

古法熏鲳鱼,本餐重点菜式,2斤几嘅鲳鱼生熏至熟,肉质紧致爽口,味道深入肉中,皮脂油香,正……

 

 

12

文记粥档


文记粥档,听D先生讲哩间野都好有历史咯~~~花生猪骨粥,粥稍稀,不过上面嘅冲菜粒几吊得起味啵


12

强记


强记,又系老号街边大排档

炒鱿鱼河,鱿鱼洗得犀利,得个爽口,已经无咩味道,河粉炒得比较湿,个人觉得麻麻……

白灼粉肠、猪潤,哩个反而好啲,材料无用碱,吃得到猪潤同粉肠嘅原味,可惜就系豉油太次…… 


 

13

老记粥面


店中招牌奶鱼粥,粥鲜美绵滑,可能系粥底本身品质就唔错

牛杂煲,只能讲哩种整法唔合我口味,味道清淡,煲到软烂,牛膀好似烂布渣甘,就金钱肚同肠可以吃下……

牛肉肠,我几中意用肉滑最馅嘅拉肠,不过无论澳门还是香港,渠哋嘅拉肠个浆好似都系混合得比较多材料,反而失去左米浆嘅风味,而且质感偏软“削”。

 

14

成记美食


相传澳门猪骨煲就系发源于此~~~哩间野最特别系渠系响一间蔬果批发市场里面嘅,嘻嘻~~

自带梅酒一支~~

辣酒煮花螺,螺肉爽口,汁浓香惹味,煮个面用嚟捞汁应该唔错

猪骨煲,有筒骨同猪脚,汤唔会好胶,但系肉味浓,筒骨附着软组织多,好吃



 DAY 2 

15

成记粥品


以猪杂粥驰名,部分猪杂系预煮熟嘅


 今次碟油条就有啲脆啦,嘻嘻 

肉丸及第粥,肉丸有味啲,都爽口啲,猪潤嫩,粉肠唔韧,唔错,不过就粥底而言,我更中意富记

鱼皮,好硬,我唔中意……


16

兰香阁


兰香阁嘅早茶,帮衬基本系阿婆阿伯 

蜂巢芋角,外层酥香,芋泥细腻;鸡批表层松化,不过内馅稍干,叉烧酥都系差唔多。

澳门哩边嘅酥饼类点心的确做得唔错。

鯆鱼干蒸,肉爽多汁,肉味较自然,不过就系好似无咩鯆鱼味啵

虾饺……哩个比较麻麻,唔讲……



猪潤烧卖,而家广州已经难揾咯……其实,系要分开哩吃嘅……

罗汉斋肠,吃晒啲馅,粉皮真系唔习惯……

 

17

梁庆记


梁庆记,又系好犀利嘅店

捞面,面条松散唔黏,爽而不韧,有明显嘅咬断感,无碱水味道,的确系靓面啊!!

老板娘送左一碟粗面畀我哋试下,对比下边种好,我个人都系中意幼面嘅爽口,不过如果系牛腩之类嘅有汁捞面,用粗面则更适合上汁~~~

云吞,一只虾仔,其他嘅都系猪肉,配比均衡,好吃过好多强调“鲜虾”嘅云吞

 


18

沧洲咖啡


以各种烘焙茶点驰名

老婆饼、蛋挞、椰蓉酥

重点系椰蓉酥,本来以为外皮会比较硬身,点知吃落系恰到好处,好似菠萝包层皮嘅感觉,不过哩个就带椰香,芯里面有啲似麻薯甘软软韧韧,几特别啵…… 

 

 

19

金船饼屋


金船饼屋,哩度有原版葡挞~~~ 

切开,挞馅同平时嘅葡挞唔同,比较实,有啲似凝固嘅果酱状态,吃落都唔系以蛋同奶味为主,挞皮有啲似牛角酥嘅状态,不过系脆一啲嘅。

PS:而家大行其道嘅葡挞应该系哩种葡挞同粤式蛋挞嘅结合体吧……


 

20

ESCADA葡国餐厅


火腿配蜜瓜,D先生一句“吃过好嘅,真系返唔倒转头……”,呵呵…… 


柠檬炒蚬,好吃,花甲肉饱满,汁香,虽然话系柠檬嘅,不过只系柠檬味道点缀一下,唔会太突出,不过个汁调味真系唔错,用嚟捞饭都几好……

香辣沙丁鱼,哩个真系好吃,用橄榄油浸嘅沙丁鱼肉质好嫩,味道完全渗入其中……最后剩下好多油,可惜啊……

 

 

自制芝士,好软,有啲似羊奶芝士嘅质感,不过无膻味,就甘吃唔过瘾,加埋浸沙丁鱼嘅油吃就唔错啦

红豆焖猪手(渠哋讲嘅红豆其实系腰豆),猪手焖得够软身入味

咸虾叶酸子蒸猪肉,哩个比较重口味,吃落的确有少少似虾酱蒸猪肉嘅味道,不过哩个味道更加丰富,但系怪怪地……

 

 

21

金垒 


乳猪,肉嫩,皮脆但系有啲发硬,都系山度士嗰种有啲奶香嘅猪好吃啲~~~

魔鬼大虾,汁好好味,虾肉爽口,不过虾本身系无咩味道嘅,嘻嘻

  


22

占西饼店 


 老牌西饼店——占西,驰名沙翁,的确系应该驰名,因为我哋买左之后一直唔记得吃,最后吃嘅时候已经压到遍晒,但系吃落都系好软熟,的确系我吃过最好吃嘅沙翁……

 

23

吴廷记冻糕 


不过因为人龙嘅原因,我哋与渠无缘……

 

24

明记美食 


某某街市嘅熟食中心,明记美食,主营鸡蛋仔,我哋当然选择明火整嘅啦,香蕉仔……不过香精味重,而且粉多,呵呵……

 

25

泉记奶茶 


泉记奶茶,店嘅婆婆一直叮嘱我哋要将茶浸够时间先致冲……茶底系2种以上嘅茶叶混合,茶味甘甜蜜香,奶味微微发散,唔会遮盖茶味~~~

 

 

26

佳记面家 


行程最后一站,佳记面家……

水饺,皮薄软滑,馅料配比恰当,不过稍欠肉香……

虾子捞,虾子香,唔会太过干身“鞋”口,面爽有力,不过单论面身,都系觉得梁庆记更胜一筹……

  



本期END-
----------------------------------------

歡迎關注“何執記”,純粹飲食分享 與你領略一城一味